第一次參與立法會論壇

(注意: 以下為港式廣東話文章)

今晚落左去一個地區組識舉辦嘅立法會選舉論壇, 九龍西區九張名單大部份都有出席, 但好遺憾民建聯同西九新動力由頭到尾都冇派人出黎參與辯論, 結果成晚兩個鐘就睇到人民力量同個騎呢林auntie喺度「招呼」民主黨同民協~

第一次參加呢種活動, 一來想見識一下, 二來因為我真係未諗到會投票俾邊一張名單! 以下分享一下今晚我嘅經歷:

個場嘅set-up係咁: 台上七張名單, 主要都係啲名單排名較後嘅參選人出黎, 除左民協譚國僑, 因為區議會佢有份選我地嗰區的(不過輸左), 所以佢在場好合理; 反而當時自稱獨立宜家又回復番西九新動力名銜嘅現任本區區議員韋海英竟然冇出席!! 台下方面, 大概有六十到八十個現場觀眾, 當中有一半睇得出係人民力量嘅人, 另外一半係街坊~

基本上由於冇保皇黨人士喺度, 人力同林auntie係咁狂D民主黨同民協, 又借助在場眾多支持者喺度吶喊助威, 每當民協民主黨講野時, 佢地都會主動「配合」叫囂責罵, 又壟斷左在場發言, 不斷重覆相類似的題目去攻擊該兩黨; 而其他團隊就各自表演, 公民黨就間唔中抽下民主黨水咁~ 結果成晚個感覺就好似係泛民主派內激進派系同溫和派系嘅對決, 台下仲有幾次幾乎大打出手!!

心諗, 搞到咁為乜?

結果我忍唔住佢地壟斷發言, 半求其半認真咁問左個房屋問題, 最後亦如我所料只有民協民主黨有正面回答我, 公民黨就求其輕描淡寫講過, 其他人只係配合佢地嘅支持者去發言, 或者伸張自己政綱如何如何咁~

經過今晚之後, 我對我嘅投票取向清晰左...

23/8/2012